اخطاء تتكرر وتتابع من السنة الماضية

السلام عليكم
يا جماعة وين الادارة واشفيهم ما يتحركون والبطولة خلاص ما بقى شي عليها بدت المشاكل تحاذف على الفريق الله يعيينهم وما عندنا لاعبين اشفيه المدرب ليكون على باله الفريق ينشد به الظهر لاعبين ما عنده ولاعبين صغار السن لا خبرة عندهم ابقي اشوفه شنو بيعمل في هاذي المباراة وبيلعب ضد فريق قوي وعنده محترفين يا جماعة يعني حطوها في عقلكم مهب المفروض يحطون احتياطات لهم انه يمكن لاعب يحترف او لاعب عنده ظروف خاصة ويكون هناك بديل له والمدرب يبقي يطلع فيها واهو ما عنده شي ومدرب مغمور والادارة اشوفها تراجعت واحنا بعد استبشرنا خير بالاجتماعات والتصريحات والظاهر هاذي السنة بتكون قاضية حق فريقنا الرفاع لانه لا لاعبين ولا مدرب يبشر بخير وانه بالنسبة لي غير متفاؤل بالفريق لانهم قعدوا يتخبطون في الاونه الاخير وتعاقدوا مع لاعب ما يدرون عنه وانهوا عقده وانه الحين ابقي اعرف المدرب مقتنع بالمجموعة اللي عنده وهل هم استفادوا من المعسكر وابقي اعرف شنو التخطيط اللي قاعد يدور في عقل المدرب , يعني بس كل سنة بنقعد نعور قلبنا على فريق ما فيه روح ولا لاعبين تقدر تشد الظهر بهم وانه ما اقول مهب عاجبيني الشباب الصغار بس يبيلهم خبرة ويكون معاهم لاعبين خبرة يستفيدون منهم اما اتقولي بلعب كله شباب وفي بطولة خارجية وما عندك اي محترف غير واحد ما ادري اهو زين او لا هاذي من الاخطاء اللي قاعده تكرر من السنتين اللي راحوا وهالمبالغ اللي انصرف لو متريثين اشوي وجايبين لاعبين عرب وخليجين احسن لهم وانا اشوف اكبر غلطة انه ما تعاقدوا مع حيدر عبيد على الاقل بيضيف شي في خط الدفاع كونه لاعب خبرة وبيستفيد منه الشباب الصغار وبتصير عندهم ثقة لانه معاهم دفاع خبرة , يعني ذي الشي ما فكروا فيه ابدا قالهم المدرب بعتمد على الشباب يعني خلاص ما عندهم حل يدعمون الفريق بدفاع محترف مع هجوم سوبر محترف ايضا لكن اشوف الامور كلها سايرة الى الخلف ولا محركين اي ساكن لانهم عارفين النتيجة اللي بيطلعون منها في هاذي البطولة وعن حسب بيحطون على روحهم في الدوري وهم للحين ما تحركوا على هذا الموضوع والقهر انه جميع المحترفين اللي جابوهم كلهم في مركز واحد واهو الوسط يعني المدرب ما يفهم وما يعرف نقاط الضعف في الفريق والحين البطولة الجاية بيعرف مستوى الاعبين اللي عنده وبيعرف ما هي الاخطاء اللي وقع فيها , والله احنا قلبنا على الفريق مهب قصد اجرح او اقلل من شان اي شخص لكن ما احب اشوف فريقي في اسوء حالاته وفي غير مستواه المعهود اللي نعرفه واحنا تعودنا يكون فريقنا فوق وتعودنا على ادارتنا تجلب لنا احسن الاعبين والمدربين وعلى مستوى والرفاع كان اي مدرب يجيبون على طول بعده يدرب المنتخب وترى هالشي اللي كتبته نابع من غيرتي على فريقي واتمنى انهم يتداركون الاخطاء من البداية . وبعد ما نبي نقول ننافس على البطولة الخارجية ولكن نبقي الدوري والبطولات المحلية نظفر بها وهذا الشي اهو اللي يعطي الثقة للجماهير الرفاعية والله يوفقهم انشاللله ونشوف منهم مستوى يرضي الجماهير المتعطشة للبطولات وااللي غبنا عنها سنتين والحين الجماهير تطالب الاعبين بالمستوى الطيب اللي يخليهم ينافسون على البطولات والله يوفقهم , وامسامحة على الاطالة لانه من زمان ما كتبت ولكن كنت متابع لمشاركاتكم في منتدى الجماهير وانشالله اكون ما اسأت حق اي شخص اوجرحت احد واذا شفتوا اي شي في كتابتي مهب عدل حذفوا الموضوع . وشكرا.